30 வகையான உணவுப்பொடிகள்

பத்மா.#அடுக்களையில் அதிக நேரம் செலவழிக்க முடியாதபோது, ‘சமய சஞ்சீவினி’யாக கைகொடுத்து உதவுவதில் பொடிகள் முக்கிய இடம் பெறுகின்றன. மேலும் சாம்பார், ரசம், கூட்டு, பொரியல் என்று எல்லாவற்றிலும் சுவை மிகுந்ததாக அமைவதில், பொடிகளின் பங்கு முக்கியத்துவம் வாய்ந்தது. இங்கே 30 பொடி வகைகளை வழங்குகிறார், சமையல்கலை நிபுணர் நங்கநல்லூர் பத்மா.

‘ருசியை அள்ளித்தரும் பொடி வகைகளைத் தந்திருப்பதுடன் வெந்தயப்பொடி, மூலிகைப் பொடி, கொள்ளுப்பொடி, வேப்பம்பூபொடி, நெல்லிக்காய்ப் பொடி என வரும்முன் காக்கும்  வரப்பிரசாதமாக விளங்கும் பொடிகளையும் இங்கே கொடுத்துள்ளேன். இவற்றை செய்து வைத்து, பல நாட்கள் பயன்படுத்தி, பலன்களை அள்ளுங்கள்’ என பரிவுமிக்க தோழியாய் கூறுகிறார் பத்மா.

பருப்புப்பொடிபருப்புப்பொடி

தேவையானவை  :  துவரம்பருப்பு – 2 கப், கடலைப்பருப்பு – ஒரு கப், செத்தல் மிளகாய் – 6, மிளகு – ஒரு மேசைக்கரண்டி, பெருங்காயத்தூள் – சிறிதளவு, உப்பு – தேவையான அளவு.

செய்முறை  :  வாணலியில் துவரம்பருப்பை பொன்னிறமாக வறுத்து எடுக்கவும். கடலைப் பருப்பையும் பொன்னிறமாக வறுக்கவும். மிளகு, செத்தல் மிளகாயையும் வறுக்கவும். எல்லாவற்றையும் ஒன்றுசேர்த்து தேவையான உப்பு, பெருங்காயத்தூள் சேர்த்து, மிக்ஸியில் அரைக்கவும்.

குறிப்பு  : எண்ணெய் விட்டு வறுக்கக்கூடாது. இந்தப் பொடியை காற்றுப்புகாத போத்தலில் போட்டு வைத்து இரண்டு மாதம்வரை வைத்து உபயோகப் படுத்தலாம்.  சூடான சோற்றுடன் பருப்புப்பொடியை சேர்த்து, எண்ணெய் அல்லது நெய் விட்டுப் பிசைந்து சாப்பிட, சுவை அசத்தலாக இருக்கும்.

பூண்டுப்பொடிபூண்டுப்பொடி

தேவையானவை :  பூண்டு(உள்ளி) – 250 கிராம், செத்தல் மிளகாய் – 10, உளுத்தம்பருப்பு – ஒரு கப், எண்ணெய் – ஒரு தேக்கரண்டி, உப்பு – தேவையான அளவு.

செய்முறை :  பூண்டை தோல் உரிக்கவும். வாணலியில் எண்ணெய் விட்டு, பூண்டை சேர்த்து மொறுமொறுப்பாக வரும்வரை வறுக்கவும் (அடுப்பை மிதமான தீயில் வைக்கவும்). உளுத்தம்பருப்பு, செத்தல்  மிளகாயை தனித்தனியாக எண்ணெய் விடாமல் வறுத்துக் கொள்ளவும். பூண்டுடன் மிளகாய், உளுத்தம்பருப்பு, உப்பு சேர்த்து பொடித்துக் கொள்ளவும்.

குறிப்பு: பூண்டு, வாயுத் தொல்லையை நீக்கும். இதய நோயாளிகளுக்கு மிகவும் பயன்தரக் கூடியது.


தேங்காய்ப்பொடிதேங்காய்ப்பொடி

தேவையானவை  :  முற்றிய தேங்காய் – ஒன்று, உளுத்தம்பருப்பு – 100 கிராம், செத்தல் மிளகாய் – 6, எண்ணெய் – 2 தேக்கரண்டி, உப்பு – தேவையான அளவு.

செய்முறை  :  தேங்காயை உடைத்து துருவிக்கொள்ளவும். வாணலியில் எண்ணெய் விட்டு தேங்காய் துருவலை சிவக்க வறுத்து, தனியாக எடுத்து வைக்கவும். உளுத்தம்பருப்பு, காய்ந்த மிளகாயை எண்ணெய் விடாமல் வறுத்து… தேங்காய், உப்பு சேர்த்துப் பொடியாக்கி நன்கு கலக்கவும்.

குறிப்பு  :  இந்த தேங்காய்ப்பொடியை சோற்றுடன் கலந்து சாப்பிடலாம். காய்கறிகளை சமைக்கும்போது மேலே தூவிக் கிளறலாம். இட்லி, தோசையுடனும் சாப்பிடலாம். கொப்பரைத் தேங்காயில் தயாரித்தால், ஒரு மாதம்வரை வைத்துப் பயன்படுத்தலாம்.


இட்லி மிளகாய்ப்பொடிஇட்லி மிளகாய்ப்பொடி

தேவையானவை  : செத்தல் மிளகாய் – 100 கிராம், உளுத்தம்பருப்பு – 1 கப், கடலைப்பருப்பு– 1 கப், எள் – 50 கிராம், பெருங்காயத்தூள் – சிறிதளவு, எண்ணெய் – 2 தேக்கரண்டி, உப்பு – தேவையான அளவு.

செய்முறை :  வெறும் வாணலியில் கடலைப்பருப்பு, உளுத்தம்பருப்பை தனித்தனியாக வறுத்துக் கொள்ளவும். எள்ளையும் வறுத்துக் கொள்ளவும். வாணலியில் எண்ணெய் விட்டு செத்தல் மிளகாயை வறுத்துக் கொள்ளவும். முதலில் கடலைப்பருப்பு, உளுத்தம் பருப்பை மிக்ஸியில் ரவை பதத்துக்கு அரைத்து, எள் சேர்த்து பொடியாக்கி எடுக்கவும். அதனுடன் காய்ந்த மிளகாய், உப்பு சேர்த்து அரைத்து எடுத்து, பெருங்காயத்தூள் சேர்த்து நன்கு கலக்கவும்.

குறிப்பு  :  காற்றுப்புகாத போத்தலில் போட்டு, கைபடாமல் கரண்டி உபயோகப்படுத்தி பயன்படுத்தினால் இது இரண்டு மாதம்வரை கெடாமல் இருக்கும்.


மிளகு  சீரகப்பொடிமிளகு சீரகப்பொடி

தேவையானவை  : மிளகு -100 கிராம், சீரகம் – 100 கிராம், பெருங்காயத்தூள் – சிறிதளவு, உப்பு – தேவையான அளவு.

செய்முறை : வாணலியில் எண்ணெய் விடாமல் மிளகு, சீரகத்தை வறுத்துப் பொடியாக்கி, இதனுடன் பெருங்காயத்தூளை சேர்க்கவும். இதை சோற்றுடன் கலக்கும்போது உப்பு சேர்க்கவும்.

குறிப்பு : ‘சம்பா சாதம்’ என்று கோயில்களில் இந்தப் பொடியை சாதத்துடன் சேர்த்து, நெய் கலந்து கொடுப்பார்கள். இது கைவசம் இருந்தால், ரசம் தயாரிக்கும்போது பயன்படுத்தலாம்.


கூட்டுப்பொடிகூட்டுப்பொடி

தேவையானவை : கடலைப் பருப்பு – 100 கிராம், கொத்தமல்லி – 100 கிராம், செத்தல் மிளகாய் – 6.

செய்முறை : வெறும் வாணலியில் கடலைப்பருப்பு, கொத்தமல்லி, செத்தல் மிளகாயை தனித்தனியாக வறுக்கவும். மூன்றையும் ஒன்றுசேர்த்து மிக்ஸியில் பொடியாக்கிக் கொள்ளவும்.

குறிப்பு : கூட்டு, பொரியல் செய்யும் போது இதை மேலே தூவிக் கிளறி இறக்கினால்… சுவை அதிகரிக்கும்.


ரசப்பொடிரசப்பொடி

தேவையானவை :  கொத்தமல்லி– 4 கப், துவரம்பருப்பு – 1  கப், சீரகம் – 1கப், மிளகு – 1  கப், செத்தல் மிளகாய் – 10.

செய்முறை: வெறும் வாணலியில் கொத்தமல்லி, துவரம் பருப்பு, மிளகு, சீரகம், செத்தல் மிளகாய் ஆகியவற்றை தனித்தனியாக வறுத்து, ஒன்றுசேர்த்து  பொடியாக்கிக் கொள்ளவும்.

குறிப்பு : புளியைக் கரைத்து இந்த ரசப்பொடி, உப்பு சேர்த்து, ஒரு தக்காளியை வெட்டிப் போட்டு, கொதிக்கவிட்டு 10 நிமிடத்தில் ரசம் தயாரித்து விடலாம். சிறிதளவு நெய்யில் கடுகு தாளித்து, பெருங்காயத்தூள் சேர்த்தால்… மணம், ருசி ஆளை அசத்தும்.


எள்ளுப்பொடிஎள்ளுப்பொடி

தேவையானவை :  எள், உளுத்தம்பருப்பு – தலா 100 கிராம், செத்தல் மிளகாய் – 6, பெருங்காயத்தூள் – சிறிதளவு, உப்பு – தேவையான அளவு.

செய்முறை : வெறும் வாணலியில் எள், செத்தல் மிளகாய், உளுத்தம்பருப்பை தனித்தனியாக வறுத்து… உப்பு, பெருங்காயத்தூள் சேர்த்து மிக்ஸியில் பொடியாக்கிக் கொள்ள வும்.

குறிப்பு :  புரட்டாசி சனிக்கிழமையில் இந்தப் பொடியை செய்து, சாதத்துடன் கலந்து பெருமாளுக்கு நைவேத்தியம் செய்வார்கள்.

கறிவேப்பிலை பொடிகறிவேப்பிலை பொடி

தேவையானவை :  கறிவேப்பிலை – 4 கைப்பிடி அளவு, உளுத்தம்பருப்பு – 100 கிராம், செத்தல் மிளகாய் – 6, உப்பு – தேவையான அளவு.

செய்முறை :  வெறும் வாணலியில் கறிவேப்பிலையை எண்ணெய் விடாமல் மொறுமொறுப்பாக வரும் வரை வறுக்கவும். உளுத்தம்பருப்பு, செத்தல் மிளகாயை தனியாக வறுக்கவும். இவற்றுடன் தேவையான அளவு உப்பு சேர்த்து மிக்ஸியில் பொடியாக்கவும்.

குறிப்பு : இதை சூடான சோற்றுடன் சேர்த்து, நெய் அல்லது நல்லெண்ணெய் விட்டு பிசைந்து சாப்பிடலாம். கறிவேப்பிலை கண்ணுக்கு நல்லது. தலைமுடி வளர்ச்சிக்கும் மிகவும் உதவும்.

ஆவக்காய் ஊறுகாய் பொடிஆவக்காய் ஊறுகாய் பொடி

தேவையானவை :  செத்தல் மிளகாய், கடுகு – தலா 200 கிராம், உப்பு – தேவையான அளவு.

செய்முறை : செத்தல் மிளகாயை மிக்ஸியில் நன்றாக பொடியாக்கிக் கொள்ளவும். கடுகையும் மிக்ஸியில் நன்றாக அரைத்துக் கொள்ளவும் இவற்றுடன் உப்பு சேர்த்துக் கலந்து வைக்கவும்.

குறிப்பு :  ஆவக்காய் மாங்காய் காலங்களில் இந்தப் பொடி மிகவும் உபயோகமாக இருக்கும். இந்தப் பொடியை உபயோகப்படுத்தி ஊறுகாய் போட்டால், ஒரு வருடம் வரை நன்றாக இருக்கும்.

அங்காயப் பொடிஅங்காயப் பொடி

தேவையானவை :  சுண்டைக்காய் வற்றல்-ஒரு கைப்பிடி, வேப்பம்பூ -ஒரு கைப்பிடி , கறிவேப்பிலை – ஒரு கைப்பிடி, சுக்கு – ஒரு பெரிய துண்டு, செத்தல் மிளகாய் – 6, கடுகு, மிளகு, சீரகம் – தலா 50 கிராம், பெருங்காயத்தூள் – சிறிதளவு, உப்பு – தேவையான அளவு.

செய்முறை : வெறும் வாணலியை அடுப்பில் வைத்து, மிதமான தீயில் ஒவ்வொரு பொருளையும் தனித் தனியாக வறுத்து, தேவையான உப்பு, சிறிதளவு பெருங்காயத்தூள் சேர்த்து மிக்ஸியில் பொடியாக்கிக் கொள்ளவும்.

குறிப்பு :  இந்தப் பொடியை ஆறு மாதம் வரை வைத்து உபயோகிக்கலாம். சூடான சாதத்துடன் கலந்து சாப்பிட ருசியாக இருக்கும். உடல்வலி, வயிற்று உபாதைகளுக்கு சிறந்த நிவாரணி இது.

நாரத்தை இலை பொடிநாரத்தை இலை பொடி

தேவையானவை : நாரத்தை இலை – 2 கைப்பிடி அளவு, காய்ந்த மிளகாய் – 4, பெருங்காயத்தூள் – சிறிதளவு, உப்பு – தேவையான அளவு.

செய்முறை : நாரத்தை இலைகளின் நடுவில் உள்ள காம்பினை ஆய்ந்து எடுக்கவும். இலைகளுடன் உப்பு, செத்தல் மிளகாய், பெருங்காயத்தூள் சேர்த்து மிக்ஸியில் பொடியாக்கிக் கொள்ளவும்.

குறிப்பு : இது, தயிர் சாதத்துடன் சாப்பிட மிகவும் சிறந்தது. ஜீரண சக்திக்கு மிகவும் நல்லது.

திடீர் புளியோதரைப்பொடிதிடீர் புளியோதரைப்பொடி

தேவையானவை :  புளி – 100 கிராம், செத்தல் மிளகாய் – 10, வேர்க்கடலை – ஒரு கப், கடலைப்பருப்பு – 4 தேக்கரண்டி, வெந்தயம் – 2 தேக்கரண்டி, கொத்தமல்லி – 4 தேக்கரண்டி, மஞ்சள் – ஒன்று (உடைத்துக் கொள்ளவும்), கட்டிப் பெருங்காயம் – ஒரு சிறிய துண்டு, உப்பு – தேவையான அளவு.

செய்முறை :  புளியை வாணலியில் போட்டு, அடுப்பை மிதமான தீயில் வைத்து, மொறுமொறுப்பாக வறுக்கவும். செத்தல் மிளகாய், கடலைப்பருப்பு, வெந்தயம், கொத்தமல்லி, மஞ்சள், பெருங்காயம், வேர்க்கடலை ஆகியவற்றை தனித்தனியாக எண்ணெய் விடாமல் வறுக்கவும். எல்லாவற்றையும் ஒன்றாக சேர்த்து, இவற்றுடன் உப்பு சேர்த்து, மிக்ஸியில் பொடியாக்கிக் கொள்ளவும்.

குறிப்பு :  இந்தப் பொடியை காற்றுப்புகாத போத்தலில் போட்டு ஃப்ரிட்ஜில் வைத்து மூன்று மாதம் வரை பயன்படுத்தலாம். வாணலியில் எண்ணெய் விட்டு கடுகு, கறிவேப்பிலை தாளித்து இந்த புளியோதரைப் பொடி சேர்த்து சோற்றுடன் கலந்தால்… உடனடி புளிசாதம் ரெடி! இந்தப் பொடியுடன் சிறிதளவு தண்ணீர் சேர்த்து… வாணலியில் எண்ணெயை சூடாக்கி, பொடிக் கரைசலை கொதிக்கவைத்தால், புளிக்காய்ச்சல் தயாராகிவிடும்.

வெந்தயப்பொடிவெந்தயப்பொடி

தேவையானவை :  வெந்தயம் – 100 கிராம், பெருங்காயத்தூள் – சிறிதளவு, உப்பு – தேவையான அளவு.

செய்முறை :  வெறும் வாணலியில் வெந்தயத்தை சிவக்க வறுத்து, தேவையான உப்பு சேர்த்து மிக்ஸியில் நன்றாக பொடியாக்கி, பெருங்காயத்தூள் சேர்த்துக் கலந்து வைக்கவும்.

குறிப்பு : காலையில் மோருடன் இந்தப் பொடியை ஒரு கரண்டி கலந்து, வெறும் வயிற்றில் குடித்தால் வயிற்றுப் புண் வராமல் தடுக்கும். உடல் குளிர்ச்சியாகும். வெறும் வெந்தயத்தை தயிரில் முதல்நாள் இரவு ஊறவைத்து, மறுநாள் காலையில் மிக்ஸியில் அரைத்து தலைக்கு தேய்த்து குளித்தால், தலைமுடி நன்கு வளரும். சூடு குறையும்.

வேப்பம்பூபொடிவேப்பம்பூபொடி

தேவையானவை :  வேப்பம்பூ – ஒரு கைப்பிடி அளவு, செத்தல் மிளகாய் – 3, உளுத்தம்பருப்பு – ஒரு கைப்பிடி அளவு, உப்பு – தேவையான அளவு.

செய்முறை :  வாணலியில் எண்ணெய் விடாமல் வேம்பம்பூ, செத்தல் மிளகாய், உளுத்தம்பருப்பை தனித்தனியாக வறுத்து, தேவையான உப்பு சேர்த்து மிக்ஸியில் பொடியாக்கிக் கொள்ளவும்.

குறிப்பு :  வேப்பம்பூ, பித்தத்தில் இருந்து நிவாரணம் அளிக்கும். வேப்பம்பூ அதிகமாக கிடைக்கும் காலங்களில் சேமித்து வைத்து… பிறகு துவையல், பொடி, ரசம், பச்சடி என்று பலவிதமாக செய்து பயன்பெறலாம்.

சாம்பார்பொடிசாம்பார்பொடி

தேவையானவை :   செத்தல் மிளகாய் – 250 கிராம், கொத்தமல்லி – 500 கிராம், துவரம்பருப்பு – 200 கிராம், கடலைப் பருப்பு – 100 கிராம், வெந்தயம், மிளகு – தலா 50 கிராம், மஞ்சள் – 2.

செய்முறை :  வாணலியில் எண்ணெய் விடாமல் செத்தல் மிளகாய், கொத்தமல்லி, மிளகு, துவரம்பருப்பு, கடலைப்பருப்பு, வெந்தயம், மஞ்சள் ஆகியவற்றை லேசாக வறுத்து (தனித்தனியாக வறுக்கவும்), மெஷினில் கொடுத்து அரைக்கவும் .

குறிப்பு :  வெயிலில் காயவைத்து அரைப்பதைவிட வறுத்து அரைத்தால், சாம்பார் பொடி வாசனையாக இருப்பதுடன், நீண்ட நாள் கெடாது.

நெல்லிக்காய் பொடிநெல்லிக்காய் பொடி

தேவையானவை :  பெரிய நெல்லிக்காய் – 10, உளுத்தம்பருப்பு – 100 கிராம், செத்தல் மிளகாய் – 2, உப்பு – தேவையான அளவு.

செய்முறை :  நெல்லிக்காயை கரட் துருவியில் துருவி வெயிலில் காயவைத்து, வெறும் வாணலியில் வறுக்கவும். உளுத்தம் பருப்பு, செத்தல் மிளகாயை தனியாக வறுக்கவும். எல்லாவற்றையும் ஒன்றாக சேர்த்து, இவற்றுடன் உப்பு சேர்த்து, மிக்ஸியில் பொடியாக்கவும்.

குறிப்பு :  நெல்லிக்காய்… விட்டமின் C, இரும்புச்சத்து மிக்கது.

கொத்தமல்லிப் பொடி#கொத்தமல்லிப் பொடி

தேவையானவை :  பச்சை கொத்தமல்லி தழை– ஒரு கட்டு, உளுத்தம்பருப்பு – 100 கிராம், செத்தல் மிளகாய் – 4, புளி – பெரிய நெல்லிக்காய் அளவு, உப்பு – தேவையான அளவு.

செய்முறை :  வெறும் வாணலியில் எண்ணெய் விடாமல் உளுத்தம்பருப்பு, செத்தல் மிளகாயை வறுத்துக் கொள்ளவும். புளியை தனியாக வறுக்கவும் (நன்கு உலரும் வரை). கொத்தமல்லியை ஆய்ந்து, கழுவி, ஒரு துணியில் பரவலாகப் போட்டு உலரவிடவும். வறுத்த உளுத்தம்பருப்பு, செத்தல் மிளகாய், புளியை மிக்ஸியில் போட்டு ஒரு சுற்று சுற்றி, உப்பு சேர்த்து, கொத்தமல்லியை கொஞ்சம் கொஞ்சமாகப் போட்டு பொடியாக்கவும்.

குறிப்பு :  இது தயிர் சாதத்துடன் சாப்பிட சிறந்தது. கொத்தமல்லி இல்லாத நாட்களில், அதற்குப் பதிலாக இந்தப் பொடியை குழம்பில் சிறிதளவு சேர்க்கலாம்.

மூலிகைப்பொடிமூலிகைப்பொடி

தேவையானவை :  வல்லாரை இலை, முடக்கத்தான் இலை, துளசி இலை, தூதுவளை இலை, கொத்தமல்லி தழை (புதினா) – ஒவ்வொன்றும் ஒரு கைப்பிடி அளவு, சுக்கு – ஒரு துண்டு, உப்பு – தேவையான அளவு.

செய்முறை :  இலைகளைத் தனித்தனியாக கழுவி, துணியில் பரவலாக போட்டு, நன்கு உலர்ந்ததும் வெறும் வாணலியில் தனித்தனியாக வறுக்கவும். வறுத்தவை எல்லாவற்றையும் ஒன்றுசேர்த்து, சுக்கை நசுக்கிப் போட்டு, உப்பு சேர்த்து மிக்ஸியில் பொடிக்கவும்.

குறிப்பு :  வல்லாரை ஞாபக சக்தி தரும். முடக்கத்தான் கீரை மூட்டுவலிக்கு சிறந்த மருந்து. துளசி – தூதுவளை தொண்டைக்கட்டு, சளி, இருமல் வராமல் தடுக்கும் சக்தி உடையவை.  கொத்தமல்லி தழை வாய் துர்நாற்றத்தை போக்கும் தன்மை கொண்டது. சுக்கு வாயுத்தொல்லையை நீக்கும். இத்தனை பயனும் உள்ள இந்த மூலிகைப்பொடி உடல் ஆரோக்கியத்துக்கு சிறந்த துணைவன்.

சுண்டைக்காய்பொடிசுண்டைக்காய்பொடி

தேவையானவை :  சுண்டைக்காய் வற்றல் – 100 கிராம், உளுத்தம்பருப்பு – ஒரு கப், செத்தல் மிளகாய் – 4, பெருங்காயத்தூள் – சிறிதளவு,  உப்பு – தேவையான அளவு.

செய்முறை :  வெறும் வாணலியில் சுண்டைக்காய் வற்றல், உளுத்தம்பருப்பு, செத்தல் மிளகாயை தனித்தனியாக வறுக்கவும். பிறகு இவற்றுடன் தேவையான உப்பு, சிறிதளவு பெருங்காயத்தூள் சேர்த்து மிக்ஸியில் பொடியாக்கிக் கொள்ளவும்.

குறிப்பு : சுண்டைக்காய் வற்றல் வயிற்றுப்போக்கை கட்டுப்படுத்தும். சூடான சோற்றுடன் இந்தப் பொடியை சிறிதளவு சேர்த்து, நெய் விட்டு பிசைந்து சாப்பிடலாம்.

ஓமப்பொடிஓமப்பொடி

தேவையானவை :  ஓமம் – 100 கிராம், மிளகு – 10, சீரகம் – ஒரு தேக்கரண்டி, உப்பு – தேவையான அளவு.

செய்முறை :  வெறும் வாணலியில் ஓமம், மிளகு, சீரகம் ஆகியவற்றை தனித்தனியாக வறுக்கவும். பிறகு அவற்றுடன் உப்பு சேர்த்து மிக்ஸியில் பொடியாக்கவும்.

குறிப்பு :  இந்தப் பொடியை சூடான சோற்றுடன் சேர்த்து, நெய் விட்டு பிசைந்து சாப்பிடலாம். மோருடன் இதை சிறிதளவு சேர்த்து அருந்தினால், ஜீரண சக்தி அதிகரிக்கும். இந்தப் பொடி கைவசம் இருந்தால் தோசை மாவுடன் கலந்து தோசை செய்தால் மிகவும் ருசியுடன் இருக்கும். சிறிதளவு வெங்காயம், இஞ்சி, பச்சை மிளகாய் வெட்டிப் போட்டு தயாரித்தால் சுவையில் அசத்தும்.

கொள்ளுப்பொடிகொள்ளுப்பொடி

தேவையானவை :  கொள்ளு – 100 கிராம், செத்தல் மிளகாய் – 6, உளுத்தம்பருப்பு – 100 கிராம், பெருங்காயத்தூள் – சிறிதளவு, உப்பு – தேவையான அளவு.

செய்முறை : வெறும் வாணலியில் கொள்ளு, செத்தல் மிளகாய், உளுத்தம் பருப்பை தனித்தனியாக எண்ணெய் விடாமல் வறுக்கவும். இவற்றுடன் தேவையான உப்பு, சிறிதளவு பெருங்காயத்தூள் சேர்த்துப் பொடியாக்கிக் கொள்ளவும்.

குறிப்பு :  கொள்ளு, கொழுப்புச்சத்தைக் குறைக்கும்.

சட்னி பவுடர்சட்னி பவுடர்

தேவையானவை :  கொப்பரைத் தேங்காய் துருவல் – 2 கப், செத்தல் மிளகாய் – 4, பொட்டுக்கடலை – ஒரு கப், உப்பு – தேவையான அளவு.

செய்முறை :  வெறும் வாணலியில் பொட்டுக்கடலை, கொப்பரைத் துருவல், செத்தல் மிளகாயை வறுக்கவும். இவற்றுடன் தேவையான அளவு உப்பு சேர்த்து மிக்ஸியில் பொடியாக்கவும்.

குறிப்பு :  இந்தப் பொடியுடன் சிறிதளவு தண்ணீர் சேர்த்துக் கலந்து… கடுகு, உளுத்தம்பருப்பு தாளித்தால்… உடனடி சட்னி தயார். சிறிதளவு தயிர் அல்லது எலுமிச்சைச் சாறு சேர்க்கலாம்.

கீரைப்பொடிகீரைப்பொடி

தேவையானவை :  கோங்கூரா (புளிச்சக்கீரை), கறிவேப்பிலை, கொத்தமல்லி தழை – ஒரு கைப்பிடி அளவு, உப்பு – தேவையான அளவு.

செய்முறை :  கோங்கூரா (புளிச்சகீரை) இலை, கறிவேப்பிலை, கொத்தமல்லி தழை ஆகியவற்றை சுத்தம் செய்து பொடிப் பொடியாக நறுக்கி, ஒரு துணியில் போட்டு, வெயிலில் உலர்த்தவும். பிறகு, இவற்றை வெறும் வாணலியில் லேசாக வறுக்கவும். இவற்றுடன் உப்பு சேர்த்துப் பொடியாக்கவும்.

குறிப்பு :  உளுந்தை ஊறவைத்து அரைத்து, இந்தப் பொடியை சேர்த்து, எளிதாக கீரை வடை தயாரித்துவிடலாம். புளிச்சகீரை, இரும்புச்சத்து கொண்டது.

பாயச பவுடர்பாயச பவுடர்

தேவையானவை :  பிஸ்தா பருப்பு – 10, முந்திரிப் பருப்பு– 100 கிராம், பாதாம் பருப்பு – 100 கிராம், ஏலக்காய்த்தூள் – சிறிதளவு, சர்க்கரை, பால் – தேவையான அளவு.

செய்முறை : பிஸ்தா பருப்பு, முந்திரிப் பருப்பு, பாதாம் பருப்பை லேசாக சூடாக்கி மிக்ஸியில் பொடியாக்கி வைக்கவும்.

பாலைக் காய்ச்சி இந்த பவுடரை கொஞ்சம் சேர்த்து, ஏலக்காய்த் தூள், சர்க்கரை சேர்த்து ஒரு கொதிவிட்டு இறக்கினால்… திடீர் பாயசம் ரெடி. வாழைப்பழம், பலாக்சுளையை சிறிய துண்டுகளாக வெட்டி சேர்த்தால், சுவை கூடும்.

தீபாவளி மருந்துப்பொடிதீபாவளி மருந்துப்பொடி

தேவையானவை :  கண்டதிப்பிலி – 50 கிராம், சுக்கு – ஒரு துண்டு, ஓமம் – 50 கிராம், சீரகம் – 2 தேக்கரண்டி, அரிசி திப்பிலி – 25 கிராம், வாயு விளங்கம் (நாட்டு மருந்துக் கடைகளில் கிடைக்கும்) – 25 கிராம், வால் மிளகு – 50 கிராம், மிளகு – 25 கிராம், சித்தரத்தை – ஒரு துண்டு.

செய்முறை :  கண்டதிப்பிலி, சுக்கு, ஓமம், சீரகம், அரிசி திப்பிலி, வாயு விளங்கம், மிளகு, வால் மிளகு, சித்தரத்தை எல்லாவற்றையும் நன்கு நசுக்கி, வெறும் வாணலியில் தனித்தனியாக வறுத்துப் பொடிக்கவும்.

குறிப்பு: பட்சணங்கள் அதிகமாக சாப்பிடும் நேரங்களில், குறிப்பாக தீபாவளி சமயத்தில், வயிற்றுக் கோளாறு ஏற்படாமல் தடுக்கும் குணம் கொண்டது இந்தப் பொடி.

ஒரு பங்கு பொடிக்கு ஒரு பங்கு பொடித்த வெல்லம் சேர்த்து, லேசாக சூடாக்கிய நெய் – நல்லெண்ணெய் 4 தேக்கரண்டி, சிறிதளவு தேன் சேர்த்துப் பிசைந்து… இந்தக் கலவையில் கொஞ்சம் எடுத்து, சிறிய நெல்லிக்காய் அளவில் உருட்டி சாப்பிடலாம்.

அடைப்பொடிஅடைப்பொடி

தேவையானவை : இட்லி அரிசி – 250 கிராம், கடலைப்பருப்பு– 1 கப், துவரம்பருப்பு – 1 கப், செத்தல் மிளகாய் – 6.

செய்முறை : இட்லி அரிசி, கடலைப்பருப்பு, துவரம்பருப்பு, செத்தல் மிளகாயை ஒன்றுசேர்த்து ரவை பதத்துக்கு அரைத்து வைத்துக்கொள்ளவும்.

குறிப்பு :  தேவைப்படும்போது, இந்த மாவுடன் தண்ணீர், உப்பு சேர்த்துக் கரைத்து, வெங்காயம் வெட்டிப் போட்டு அடை தயாரிக்கலாம்.

தனியாப்பொடிதனியாப்பொடி

தேவையானவை : கொத்தமல்லி (தனியா) – ஒரு கப், உளுத்தம்பருப்பு – 2 தேக்கரண்டி, செத்தல் மிளகாய் – 4, உப்பு – தேவையான அளவு.

செய்முறை: வாணலியில் எண்ணெய் விடாமல் கொத்தமல்லி, உளுத்தம்பருப்பு, செத்தல் மிளகாயை தனித்தனியாக வறுக்கவும். இவற்றுடன் உப்பு சேர்த்து மிக்ஸியில் பொடிக்கவும்.

குறிப்பு : தனியாப்பொடி பித்தத்தை தணிக்கும். இதை சூடான சாதத்துடன் சேர்த்து சாப்பிடலாம்.

பஜ்ஜி பவுடர்பஜ்ஜி பவுடர்

தேவையானவை :  கடலைப்பருப்பு – 100 கிராம், அரிசி – 200 கிராம், செத்தல் மிளகாய் – 6, சோள மாவு – 2 தேக்கரண்டி, பெருங்காயத்தூள் – சிறிதளவு.

செய்முறை : கடலைப்பருப்பு, அரிசி, செத்தல் மிளகாயை மெஷினில் கொடுத்து நன்றாக அரைக்கவும் (மிக்ஸியிலும் அரைக்கலாம்). இதனுடன் சோள மாவு, பெருங்காயத்தூள் சேர்த்துக் கலந்து வைக்கவும்.

குறிப்பு : தேவைப்படும்போது, இந்த மாவுடன் உப்பு, தண்ணீர் சேர்த்துக் கலந்து பஜ்ஜி மாவு பதத்தில் கரைத்து… விருப்பமான காய்களைத் தோய்த்து பஜ்ஜி தயாரிக்கலாம்.

வடை பவுடர்வடை பவுடர்

தேவையானவை :  தோல் நீக்கிய உளுத்தம் பருப்பு – 250 கிராம், மிளகு – 20, செத்தல் மிளகாய் – மூன்று, பெருங்காயத்தூள் – சிறிதளவு, உப்பு – தேவையான அளவு.

செய்முறை :  உளுத்தம்பருப்பு, மிளகு, செத்தல் மிளகாயை மெஷினில் கொடுத்து நன்றாக அரைக்கவும் (மிக்ஸியிலும் அரைக்கலாம்). பிறகு இதனுடன் உப்பு, பெருங்காயத்தூள் சேர்த்துக் கலந்து வைக்கவும்.

குறிப்பு :  தேவைப்படும்போது, மாவுடன் தண்ணீர் கலந்து கெட்டியாகப் பிசையவும். முட்டைக்கோவா (கோஸ்) துருவல், நறுக்கிய கீரை, வெங்காயம் என விருப்பமானதை சேர்த்து, பிசைந்து வடைகளாகத் தட்டி, எண்ணெயில் பொரித்தெடுக்கலாம்.

-nermaiendrum.com