சோளத்தின் மருத்துவ குணங்கள்

சோளம்சோளம் என்பது புல்வகையைச் சேர்ந்த பல இனங்களை உள்ளடக்கிய தாவரப் பேரினம் (genus) ஆகும். இவற்றுள் சில தானியங்களுக்காகவும் வேறு சில கால்நடைத் தீவனங்களுக்காகவும் பயிரிடப்படுகின்றன. சிலவகைகள் மேய்ச்சல் நிலங்களில் இயற்கையாக வளர்கின்றன. இப்பயிர் உலகம் முழுதும் மிதமான வெப்பம் கொண்ட பகுதிகளில் பயிராகின்றன. இவ்வினங்கள், எல்லாக் கண்டங்களையும் சேர்ந்த வெப்ப வலய மற்றும் குறை வெப்பவலயப் பகுதிகளையும், தென்மேற்கு பசிபிக், ஆஸ்திரேலிய பகுதிகளையும் தாயகமாகக் கொண்டவை.

இந்திய மாநிலமான தமிழகத்தில் பொங்கல் திருநாளன்று வெண்சாமரச் சோளம் பயன்படுத்தப்படும். இன்றும் இது திருச்சிமாவட்டம், பெரம்பலூர் மாவட்ட கிராமங்களில் வெகு சிலரால் பயிரடப்படுகிறது. இது நாட்டுவகைச் சோளம். பெரும்பாலோர் கலப்பின ரகச் சோளங்களையே பயிரிடுகின்றனர்.

பழுப்பு நிற சோளம் மனிதர்களுக்கும் விலங்குகளுக்கும் உணவாகப் பயன்படுகின்றது. இது பெரும்பாலும் தென் ஆப்ரிக்காவில் விளைவிக்கப்படுகின்றது. தற்போது இது மழை குறைவாக பொழியும் அனைத்து நாடுகளிலும் விளைவிக்கப்படுகின்றது. இது நான்கு மீட்டர் உயரம் வரை வளரும். இப்பயிர் மூன்று முதல் நான்கு மில்லி மீட்டர் வரை சுற்றளவு கொண்டிருக்கும். இதன் இலைகள் மருந்து, மற்றும் எத்தனால் தயாரிக்கப் பயன்படுகிறது.

இந்தியாவில் அரிசி மற்றும் கோதுமைக்கு அடுத்தபடியாக சோளம் முக்கியமான இடத்தை பிடித்துள்ளது. முழுமையான மற்றும் உடைத்த சோளம் வேகவைத்து அரிசி போன்றும் பயன்படுத்தப்படுகிறது. முழுச்சோளத்தை அரைத்து அம் மாவிலிருந்து சப்பாத்தி போன்றும் பயன்படுத்தப்படுகிறது. சோளமானது நொதித்தல் தொழிற்சாலை மற்றும் எரிசாராயம் மற்றும் கரைப்பான் தொழிற்சாலைகளில் மாவுச்சத்துப் பொருளாகப் பயன்படுத்தப்படுகிறது.

100 கிராம் சோளத்தில் 70.1 கிராம் மாவுச்சத்து, 127 மி.கி. புரதசத்து, 3.1 மி.கி. கொழுப்பு உள்ளது. பாஸ்பரஸ் 222 மி.கி., கல்சியம் 25 மி.கி. இரும்பு சத்து 4 மி.கி. மற்றும் பொட்டாசியம் போன்ற தாது சத்துக்களும் உள்ளன.

சோளம்-thamil.co.ukமருத்துவ பயன்கள்

பொட்டாசியம் தசைகள் நன்கு சுருங்க விரிய உதவுகிறது. இரத்த ஓட்டத்தையும் சீர் செய்யும். உடலுக்கு நோய் எதிர்ப்பு சக்தியை தரும்.

பாஸ்பரஸ், கல்சியம் போன்ற தாதுக்கள் எலும்புக்கு உறுதியளிக்கும்.

 சோளம், ஆன்டிஆக்ஸிடண்ட் நிறைந்த உணவு, அதன் மேல் தோலில் மெழுகு போன்ற பொருள் உள்ளது. அது நீரிழிவு நோய் செரிமான குறைகள், இரத்தசோகை, சர்க்கரை நோய் முதலியவற்றைக் குணப்படுத்துகிறது.

சிறுநீரை அதிகமாகப் பெருக்கும் சக்தி இதற்கு இருப்பதால், உடம்பில் உள்ள உப்பைக் கரைக்கும் தன்மை உண்டு.

கண் குறைபாடுகளை சீர் செய்யும் ‘பீட்டா கரோட்டின்’, இதில் அதிகமாக உள்ளது.

மூல நோயாளிகளுக்கு சோள உணவு ஒத்துக்கொள்ளாது.

சோளத்தில் ஒவ்வாமையை உருவாக்கக்கூடிய குளுட்டின் இல்லை. அதனால் பசை தன்மை இந்த மாவில் இருக்காது. எளிதில் ஜீரணமாகும். எல்லோரும் சாப்பிடலாம்.

நவதானிய தோசை

தேவையானவை:
பாசிப்பயறு – கால் கப், கருப்பு உளுத்தம்பருப்பு – கால் கப், கொண்டைக்கடலை – கால் கப், பச்சரிசி – கால் கப், துவரம்பருப்பு – கால் கப், கொள்ளு – கால் கப், சோயா – கால் கப், வெள்ளை சோளம் – கால் கப், எள்ளு – ஒரு மேசைக்கரண்டி, பச்சை மிளகாய் – 3, காய்ந்த மிளகாய் – 6, இஞ்சி – ஒரு துண்டு, தேங்காய் துருவல் – ஒரு மேசைக்கரண்டி, கறிவேப்பிலை – சிறிது, பெருங்காயத் தூள் – அரை தேக்கரண்டி, உப்பு – தேவையான அளவு, எண்ணெய் – தேவையான அளவு, பொடியாக நறுக்கிய கொத்துமல்லி – சிறிதளவு.

செய்முறை:
எல்லா தானியங்களையும் ஒன்றாக போட்டு நன்றாகக் களைந்து சுமார் 5 மணி நேரம் ஊறவைக்கவும். ஊறிய பிறகு தானியங்கள், தேங்காய் துருவல், பச்சை மிளகாய், காய்ந்த மிளகாய், இஞ்சி, கறிவேப்பிலை, பெருங்காயம், உப்பு இவற்றைச் சேர்த்து நன்றாக அரைக்கவும். பொடியாக அரிந்த கொத்துமல்லிஇலையை சேர்த்து மெல்லிய தோசைகளாக வார்த்து எடுக்கவும். இஞ்சி சேர்ப்பதால் எளிதில் ஜீரணமாகும்.

-பசுமை இந்தியா
-இயற்கை அளிக்கும் நிவாரணங்கள்